အမည်သညာခေါ်စရာကား….

အခုတလော..တခီတည်း..ခီနေတာတွေ..မြင်နေ၊ ကြားနေရတော့..ကိုယ်တွေ့လေး နည်းနည်း..ပြောပြချင်စိတ် ပေါက်လာလို့ပါ။ မြန်မာနံမည်တွေနဲ့ ပတ်သက်လာရင် နိုင်ငံခြားမှာအခြေချနေထိုင်ကြတဲ့ မြန်မာအများစုလည်း ကိုယ့်အဖြစ်လိုဘဲ ကြုံကောင်းကြုံကြရမှာပါ။ သားအကြီးဆုံးနံမည်က အောင်စည်မြင့်။ စင်္ကာပူမှာ (၁၉၈၄-၈၇) မူလတန်း ကျောင်းတက်ရတော့ Singaporean တရုတ်နံမည်ထုံးစံအတိုင်း အောင်က Family name လို့ယူဆ၊ နောက် ၂ လုံးဖြစ်တဲ့ စည်မြင့် (Si Myint) ကို စီမိုင်ရင့် လို့အသံထွက်ကြတယ်။ သားကြီးက My yint မဟုတ်ဘူး တလုံးတည်း Myint လို့ပြောပေမဲ့ သူတို့ဘယ်လိုဘဲ ကြိုးစားခေါ်ခေါ် မင့် ဘဲထွက်ကြပါတယ်။ ဒါနဲ့ သားကြီးကို စီမင်း လို့ဘဲခေါ်ကြတယ်လေ။ သားငယ်နံမည်ကတော့ ဇာနည်အောင်ဆိုတော့ ရှေ့က Zarni က ဘိုနံမည်နဲ့ ဆင်တော့ ခေါ်ရတာသိပ်မခက်ကြပါဘူး။ အောင်ဆိုတာကလည်း တရုတ်တွေရဲ့ Ong/Ng/Ang တို့အသံထွက်တွေနဲ့ ဆင်တယ်လေ။ သမီးနံမည်က ဝါဝါရည်မွန် ဆိုတော့ စင်္ကာပူကလူတွေခေါ်တော့မှဘဲ ဝါဝါအီးမှန် ဖြစ်တော့တာ။ Wah Wah ကတော့ ခေါ်ရတာမခက်ဘူး။ Yi Mon ကို Y က ပြင်သစ်လိုဆိုရင် ee-greck အီးဂရက်လို့ အသံထွက်တော့ Y က E လို့ အသံထွက်ပြီး Mon က Monday လိုဖြစ်နေပြန်တော့ သမီးခမျာ ဝါဝါအီးမှန် ဖြစ်သွားပါလေရော..သမီးက ငယ်သေးတော့ မူကြိုကျောင်းမှာ ခဏတဖြုတ်ဘဲတက်ခဲ့ရလို့ တော်ပါသေးရဲ့။ ဒါပေမဲ့..အကို ၂ ယောက်ကတော့ ကောင်းကောင်း စ တော့တာပေါ့။ ကျမကိုတော့ Singaporean မိတ်ဆွေတွေက Miss Khin လို့ခေါ်တဲ့သူခေါ်၊ Soe Win လို့ခေါ်တဲ့သူခေါ်ပေါ့။ 

အမေရီးကားရောက်တော့ ရှေ့ဆုံးက Khin က First name, အလယ်က Soe က Middle Name – Initial ဘဲဆိုတော့ S ပေါ့။ နောက်ဆုံးက ဝင်း ကတော့ last name/ family automatic ဖြစ်သွားပါလေရော။ ခင်စိုးဝင်း ဆိုတဲ့နံမည်က ကျမနံမည်ပါ။ မွေးကတည်းက မှည့်ထားတာ Maiden name လေ။ သုံလုံးစလုံးခေါ်ရတာ။ အဖေနံမည်၊ မိသားစု နံမည်မဟုတ်ဘူး။ တလုံးချင်းခေါ်လို့မရဘူး။ ဘာညာသာဓကာ ခဏခဏရှင်းပြဘူးပါရဲ့။ ဘယ်သူမှ စိတ်မဝင်စားပါဘူး။ ဒီ Burmese တွေကလည်း ထူးဆန်းလိုက်တာဆိုတဲ့ အကြည့်နဲ့လေ။ ကြာတော့လည်း ရိုးသွားပြီး Miss Win အဖြစ်ခံယူ။ အလယ်က “စိုး” ကပျောက် KHIN S. WIN ကနေ အခု KHIN WIN ဖြစ်သွားတာ အနှစ် ၂၀ ကျော်ခဲ့ပါပြီ။ သားကြီးခမျာမှာလည်း Aung Myint ဖြစ်။ သားငယ်ကတော့ အိုကေပါတယ်။ သမီးကတော့ အိမ်ထောင်ကျပြီး အမျိုးသားရဲ့ Last name ကိုယူလိုက်ပါတယ်။

သားကြီးက သူ့နံမည်ကို သူမကြိုက်ဆုံး၊ သူက ငယ်ငယ်က ဝဝတုတ်တုတ်လေးဆိုတော့၊ အောင်စည်မြင့်ဆိုတဲ့နံမည်ကို TTC ကျောင်းမှာတုန်းက အောင်စည်ပိုင်း လို့အခေါ်ခံခဲ့ရဘူးတာရယ်၊ Last name က မြင့်ဖြစ်နေတာရယ်ကို တော်တော်ကသိကအောက်ဖြစ်ပြီး အခုထိ နံမည်နဲ့ ပတ်သက်လာရင် Trauma ရနေဆဲပါဘဲ။ သားကြီးမွေးကာစက အသားမဲမဲ၊ မျက်လုံးပြူးပြူးလေးနဲ့ ဆိုတော့ ဖိုးကုလားလို့ ခေါ်ခဲ့ကြဘူးတယ်။ သားကြီးထက် ၁၈ ရက်ဘဲငယ်တဲ့ (အမအကြီးဆုံးရဲ့ ဒုတိယသမီး) တူမ ယုယုကတော့ အသားဖြူဖြူ၊ မျက်ပေါက်ကျဉ်းတော့ အဖွားက တရုတ်မလေးနဲ့တူလို့ မိတရုတ်တဲ့။ ဖိုးကုလားနဲ့ မိတရုတ်မောင်နှမ ၂ ယောက်ပေါ့။ 

သားကြီးကို ဖိုးကုလားလို့အိမ်မှာ ချစ်စနိုးခေါ်ကြတာကို သူ့အဖေဘက်က အဖွား-မြေးတွေအခေါ် ဖွားဖွားမာမီ (မာမီစီ) ကလုံးဝ ကန့်ကွက်ပါလေရော။ သူ့သားကြီးရဲ့ သားမြေးအကြီးဆုံးကို ဖိုးကုလားလို့မခေါ်ကြပါနဲ့တဲ့။ ကြာသပတေးထွန်းမို့ အပါလို့မှည့်လိုက်ပါတယ်။ ရပ်ကွက်ကလူတွေကို ဒန်ပေါက်ကျွေးပြီး ဖိုးကုလားလို့မခေါ်ဖို့ လာဘ်ထိုးခဲ့ရပါတယ်။ နံမည်ရင်းကိုလည်း သူကိုယ်တိုင် မဟာဘုတ်တိုင်ထူပြီး မှည့်တော့တာ။ တနင်္ဂနွေသားဆိုတော့ ရှေ့ဆုံးက အောင်၊ သူ့နံမည် ခင်ခင်စီ ထဲက စီကိုလည်း အလယ်မှာထားပေါ့။ ကြာသပတေးထွန်းတယ်ဆိုတော့ မ နဲ့ ပိတ်ရမယ်ဆိုပြီး မာမီစီက မြင့်လို့ခေါ်တဲ့ မလုံးရဲ့အမေ အဖွား ဒေါ်စိုးမြင့်နံမည်ကိုယူလိုက်တာ။ သားကြီးရဲ့ နံမည်ခမျာ ဘယ်သူမှမမှည့်တဲ့ အောင်စီမြင့်ရယ်လို့ ကင်ပွန်းတပ်ခြင်းခံခဲ့ရပါတယ်။ ကျောင်းနေတော့ အလယ်က စီ ကို စလုံးညသတ် စည်လိုက်ပါတယ်။ (စကားချပ် - ဖွားဖွားမာမီက ဗေဒင်တွက်ကြည့်တော့ သူ့မြေးက ကြသပတေးထွန်းဆိုတော့ ပညာတော်မှာတဲ့။ မှန်ချက်က ၉ ကျော်ပါတယ်။)

သားကြီးကအိမ်ထောင်ကျပြီး ၁၀ နှစ်လောက်နေမှ သားတယောက်ထွန်းကားပါတယ်။ အမေရီးကားမှာမွေးတဲ့သားဆိုတော့ အများခေါ်ရလွယ်အောင် သူ့လို နံမည်နဲ့ပတ်သက်ပြီး Trauma မရအောင် Andrew Win Myint လို့ မှည့်ပါတယ်။ ဝင်းကတော့ အဖိုးနဲ့ အဖွားဆီကယူပြီး သူ့ရဲ့ last name ဖြစ်သွားတဲ့ မြင့်ကိုထည့်လိုက်တာပါဘဲ။ ဖွားလုံးကတော့ သူ့ကို ချစ်စနိုးနဲ့ Drew Drew လို့ခေါ်ပါတယ်။ သားငယ်ဇာနည်ရဲ့ သား ၂ ယောက်နဲ့ သမီးလေးကိုတော့ ဘိုလိုရော၊ မြန်မာလိုပါခေါ်ရလွယ်တဲ့ Hayne (ဟိန်း)၊ Thayne (သိန်း) နဲ့ Thadah (သဒ္ဒါ) လို့ နံမည်ပေးထားပါတယ်။ 
စင်္ကာပူနေတုန်းက မဥမ္မာသိန်းဆိုတဲ့ အသိအမတယောက်က သူ့သားလေး ဇင်သိန်းကို ဇင်သီယန်းလို့ခေါ်တာကြာဖူးပါတယ်။ ကလေးကိုကျောင်းမှာ Zin Thein ကို ဇင်သီယန်းလို့ခေါ်တာနားယဉ်နေတော့ အဲ့လိုခေါ်မှ ထူးလို့ပါတဲ့။ 

ကျမတို့ရုံးက ကြေးမုံးဆိုရင် ၆ နှစ်အရွယ်မှာ မိဘနဲ့အတူ မြန်မာပြည်ကနေ နိုင်ငံခြားထွက်တဲ့အခါ နိုင်ငံကူးလက်မှတ်မှာနံမည်ရေးတဲ့လူက ကြေးကို Kyae နဲ့ ပေါင်းရမယ့်အစား Kaye လို့ပေါင်းလိုက်တာ အခုထိ Kaye ကေးဖြစ်နေဆဲပါဘဲ။ ကြေး ဆိုပြီး Kyae နဲ့ ပေါင်းရင်လည်း ဒီအမေရီးကားမှာ ကယေး ဒါမှမဟုတ် ခေးလို့ အသံထွက်ကြမှာပါဘဲ။ ဒါ့ကြောင့်..တခီတည်း..ခီနေကြတဲ့ အဖြစ်နဲ့ ဆက်စပ်လို့..ပွားလိုက်ရပါကြောင်း…